Марий Эл технологий лидерствын «У материал ден химий» калыкле проектышкыже ушнаш ямде
Екатеринбург олаште промышленность шотышто координационный советын заседанийыштыже Марий Элын промышленность, экономически вияҥмаш да торговля министрын сомылжым шуктышо Владимир Халюзин каласен: республике химий производствын у корныжо- влакым ямдылаш шона. Тудын мутшо почеш регионышто тиде отрасль дене кылдалтше вӱдышӧ предприятий- влак пашам ыштат. Шукыжо уло эл мучко палыме улыт. Марий Элыште эм препарат, кочкышыш ешартыш, лак да чия материал ден быт химийым чолган луктыт. Республикын продукцийже элысе да йот элласе 70 утла регионыш колталтеш. Марий Эл технологий лидерствын «У материал ден химий» калыкле проектышкыже ушнаш ямде. Проектым шыҥдарыме йодышым Координаций советыште каҥашыме. Пашан тӱҥ корныжо- влак: кӱлешан вещества- влакым, тушеч ыштымым але полупродуктым кондымо кылым уэш ыштымаш, шанче институт ден вузлам пашаш ушен у изирак производство- влакым виктарымаш, посна продукт дене федерал компетенций рӱдер- влакым ыштымаш. Ушештарена: Марий элын делегацийже Екатеринбург олаште «Иннопром-2024» Тӱнямбал промышленный ончерыште пашам ышта.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
