Марий Эллан 100 ий темме лӱмеш пайрем мероприятий эртен

      Теҥгече Марий Эллан 100 ий темме лӱмеш Эрик Сапаев лӱмеш Марий Кугыжаныш академический театрыште пайрем мероприятий эртен. Театрын фойештыже темтик выставке пашам ыштен. Тушто марий кундемын илышыж нерген  каласкалыше архив экспонат ден книга- влакым ончыктымо. А залыште концерт лийын. Тудын тӱналме деч ончыч республикын историйже нерген каласкалыше чапле фильмым ончыктымо. Сцена гыч Марий Элыште илыше калыкым Республикым вуйлатыше Александр Евстифеев саламлен. Тудо палемден: иканаште кок пайрем лач толын: Марий Эллан 100 ий темме да Калыкын икоян улмо кечыже. Тудо Российын Президентше Владимир Путинын саламлымашыж дене палдарен да каласен: калык кокласе поро кылым арален кодымаш кугыжанышын ик эн кӱлешан задачыже. Тудо Марий Элыште чаткан илышыш шыҥдаралтеш. Марий кундем нерген историйыште 10-шо курымышто ушештарыме, а кундемым рашемдымаш 1920-шо ийыште тӱҥалын. 4-ше ноябрьыште Всероссийский Рӱдӧ исполнительный комитет ден Калык комиссар- влакын Советышт «Марий калыкын автоном областьшым ыштыме нерген» пунчалым пеҥгыдемденыт. Марий Эл Кугу эл дене пырля чыла неле да куанле жапымат достойно эртен. Кызыт калыкле проект- влакыш пурышо регионысо 53 проект илышыш шыҥдаралтеш. Тиде пашалан 2024-ше ий марте 52 миллиард теҥге ойыралтеш. 
       Умбакыже республикым вуйлатыше ыштыме да ыштышаш паша- влак нерген каласкален, кугу пайрем- влак дене республикысе калыкым саламлен. Торжественный ужашым иктешлышыла, кугыжаныш награде- влакым кучыктен. «Россий Федерацийын сулло врачше» лӱмым Перинатал рӱдерын пӧлкажым вуйлатыше Светлана Шептунова, «Российын сулло лесоводшо» лӱмым Шернур лесничестве гыч Евгения Софронова, «Россий тазалыкаралтышын сулло пашаеҥже» Чап лӱмым Республикысе противотуберкулёз диспансерын тӱҥ медшӱжарже Полина Волкова, Российысе физический культурын сулло пашаеҥже» лӱмым Спорт школын директоржо Людмила Ушакова, «Российын сулло туныктышыжо» лӱмым Лилия Тарасова налыныт. Президентын Чап грмотыжым Йошкар-Оласе эмлыме верын врачше Лариса Бендерлан кучыктымо. Президентын тауштымашыжым Икымше поликлиникын врачше Ирина Зеленко ден Козьмодемьянскысе лицейын туныктышыжо Светлана Маринкиналан увертарыме. 
          «Марий Эл ончылно надырлан» кокымшо степенян орден дене Верховный судын председательже Александр Давыдов, орденын медальжым художественный училищын туныктышыжо Владимир Курочкин ден рӱдӧ сайлыме комиссийым вуйлатыше Ирина Татаринова палемдалтыныт. Федераций Советым вуйлатышын тауштымашыжым Кугыжаныш Погынын почётан председательже Юрий Минаковлан увертарыме.

Прошлые выпуски