Марий Эл Республикым вуйлатыше уло калыкым икоян улмо кече да Республикым ыштымылан 100 ий темме дене саламла
Марий Эл Республикым, Правительствым вуйлатыше Александр Евстифеев кундемыштына илыше уло калыкым икоян улмо кече да Республикым ыштымылан 100 ий темме дене саламла. Тиде событий шуко калыкын келшен да икте весым умылен илыман Марий кундемлан исторический лийын. Эртыме жапыште республике куандарыше лектышыш шуын. Поро вашталтыш чыла сферыштат лийын: медицина да илыме комплекс, социал кӱлешан объект- влак чолган чоҥалтыт, промышленный производство да ял озанлык сату утларак да утларак ышталтеш, ял озанлык мланде уэш пӧртылталтеш, театр, университет, школ- влак пашам ыштат. Шуко вашталтышлан Президентын тӱҥалме калыкле проект- влак йӧным ыштат. Кеч-могай жапыштат шочмо элым йӧратымаш, вий-куатым чумырымаш элысе калыкын тӱҥ вийже лийын. Тудак у сеҥымашыш, вашталтышыш вӱден наҥгаен, пеҥгыдемден да эрыкан элыш савырен. Марий Элысе калыкат тыгаяк- пашам йӧратыше, чын, виш чонан, шочмо элым йӧратыше. Тыште шочын кушшо-влакат Кугу сеҥымашым кондаш шке надырыштым пыштеныт, элын экономикыжым нӧлтымаште полшеныт. Ӱшанем: 100 ияш кужытым эртымеке, республике эше у куатым налеш да ончыкыжым эше пеҥгыдынрак вияҥаш тӱҥалеш,- ойлалтеш республикым вуйлатышын саламлымашыштыже.
