Марий Элым кодшо ийын вияҥдымашым иктешлыме

Марий Элым кодшо ийын вияҥдымашым иктешлыме
            Республикыштына ял озанлыклан кугыжаныш велым полшаш тений 936 миллион теҥге колталтеш. Касвел элла могырым санкций дене темдымым шотыш налде Марий Элыште ӱшанле социал-экономик ситуаций вияҥын. Адакшым ял озанлыкыште, илыме верым чоҥымаште, южо промышленностьышто да эше икмыняр отрасльыште сай динамике палдырна. Кодшо ийын лектышыже да тенийлан задаче- влак нерген Марий Эл Правительствыште Юрий Зайцевын эртарыме заседанийыште ойлымо. Вуйлатыше сеҥымаш- влакым палемден да погынышо- влакым чоҥымаш, архитектура, илыме вер да коммунал озанлык министр Наталья Ошланова, кӧргӧ политике, верысе самоуправленийым вияҥдымаш да юстиций министр Антон Мирбадалев дене палымым ыштен да нунылан лектышан пашам тыланен.
            Кодшо ийын лектышыже да тенийлан задаче нерген промышленность, экономически вияҥмаш да торговля министр Станислав Крылов каласкален. Тудо палемден: кодшо ийын агропромышленный комплексыште продукцийым 58 утла миллиард теҥгеашым лукмо але 2021-ше ий дене таҥастарымаште 105 утла процентым. Тыгак шӧрым, муным, саскам, пареҥгым шукырак ыштен налме, пырчым ик тичмашат 8 луаш нарылан шукырак погымо. Илыме верым 21-ше ий деч 17 утла процентлан шукырак ыштыме. Промышленностьышто кодшо ийын электрон да оптик сатум 25 процентлан, пластмасс изделийым 22, коваштым да коваште сатум 13, чоҥымо материалым 5 наре процентлан утларак ыштен налме. Нине отрасльыште теният лектыш изи огыл лийшаш. Кодшо ийын 11 АПК предприятийлан 12 проектым шыҥдараш 124 миллион теҥгем ойырымо. 2023-шо 2024-ше ийлан индивидуал программын мероприятийжылан кок миллиард теҥгем колташ, 428 у пашаверым почаш, ик миллиардат 800 миллион бюджетдыме инвестицийым кондаш, 6 объектым чоҥен шукташ палемдыме.
            Марий Элым вуйлатыше сай динамикым арален кодаш, инвестиций пашалан кугыжаныш полышым пуымылан тӱткышым ойыраш, изи да кыдалаш бизнеслан полшаш, калыкын илышыжым саемдыме пашам умбакыже шыҥдараш кӱлеш манын каласен.
            Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски