Марий Элын студент отрядше Сахалиныште регион- влак кокласе проектыште эн сай лийын

Марий Элын студент отрядше Сахалиныште регион- влак кокласе проектыште эн сай лийын
              Марий Элын студент отрядше Сахалиныште регион- влак кокласе проектыште эн сай лийын. Республикын студент  отрядше- влакын еҥышт Сахалин областьыште регион- влак кокласе «Оха» кол дене пашам ыштыше студент отряд- влак пашаштым мучашленыт да паша тургымын лектышыже почеш эн сай лийыныт.
              Икымше июль гыч 20-шо август марте боец- влак Сахалинысе колым перерабатыватлыше предприятийлаште пашам ыштеныт. Студент отряд- влакын пашашт колым да мӧртньым, ракым да моллюскым перерабатыватлыме тичмаш цикл да продукцийым ямдылен консервироватлыме дене кылдалтын. Ӱдыр-рвезе- влакын мутышт почеш паша куштылго огыл. Тудо чытымашым, ответственностьым да команде дене пашам ыштен моштымашым йодеш.
             Районысо тӱвыра пӧртыштӧ эртыше Проектым петырыме торжественный церемонийыште Марий Элын «Эрыкын отрожо» студент отрядшым эн сайлан шотлымо. Аклыме годым паша лектышым гына огыл, боец- влакын тӱвыра, спорт да моло мероприятийлаште чолгалыкыштым шотыш налме. Кӱкшӧ акым отрядын комиссарже Елизавета Малышеват налын. Тудо регион- влак кокласе «Оха» путинный студент отрядын эн сай комиссарже лийын.
              Паша тургымышто чылаже Российын тӱрлӧ кундемже гыч 60 студент участвоватлен. Марий Элысе студент отряд- влаклан тиде сеҥымаш посна значениян улеш. Регионысо толкынын 20 ий утла жапыштыже  отряд кокымшо гана веле эн сай отряд тисте  дене пӧртылын. Тидат куандара- тыгай сеҥымаш Марий Элысе студент отряд- влаклан лӱмгече идалыкыште толын. Тений Марий Элысе студент отряд толкынлан 60 ий темеш.
                Фото: «РСО» МООО-н Марий регионысо пӧлкаже.

Прошлые выпуски