Марий Элын туныктыш министрже сеҥымашыш шушо тунемше- влак дене вашлийын

      Марий Элын туныктыш да шанче министрже Наталья Адамова школышто тунемше- влакын Россий кӱкшытан «Кугу перемена» конкурсыштыжо финалыш лекше- влак дене вашлийын. 31-ше октябрь гыч 5-ше ноябрь марте «Артек» Тӱнямбал йоча рӱдерыште Россий конкурсын финалже эртен. Тушто мемнан республикын чапшым 28-ше лицейыште тунемше Диана Москвина, 15-ше школ гыч Анастасия Исакова араленыт. А Бауман лицей гыч Евгения Брылякова «Кугу перемен. Ончыкылык тый дечет шога» мюзиклыште участвоватлен.
         Ӱдыр- влак туныктыш министрлан шке куанышт, таҥасымаш- влак, нелылык да кумылым нӧлтышӧ тат-влак нерген каласкаленыт. Министр палемден: тыгай кугу мероприятийыш республикысе тунемше- влакын ушнымышт куандара. Вес ийын эшеат шукырак ӱдыр-рвезе ушнат манын ӱшаным каласен. Вес ий гыч 8-10-шо класслаште тунемше- влаклан конкурс кажне ийын эртаралташ тӱҥалеш. 
        А тений сеҥыше- влаклан кок шӱдӧ тӱжем гыч ик миллион теҥге марте окса премийым пуэныт, а чыла финалистше «Артекыш» путёвкым, фирме курткым, сумкам, Сбербанкын картыжым налыныт.

Прошлые выпуски