Марий Элысе тӱшка транспортышто билет деч посна кудалыштмылан тӱжем теҥге штрафым тӱлыктат
Марий Элысе тӱшка транспортышто билет деч посна кудалыштмылан тӱжем теҥге штрафым тӱлыктат. Кугыжаныш Погынын депутатше- влак черетан сессийыштышт пассажирым шупшыктымаш дене кылдалтше кок законым пеҥгыдемденыт. Республикын правительствыжлан троллейбус дене калыкым шупшыктышо организацийын материально-техник базыжым пеҥгыдемдаш ресубликын бюджетше гыч трансфертым ойыраш правилым пеҥгыдемдаш полномочийым пуымо. Тиддеч посна муниципал маршрут дене калыкм шупшыктышо перевозчик транспортын кушто улмыжо нерген уверым «Транспортым виктарымаш» АИС-ыш жапыштыже пуэн ок шого гын, тудым калыкым шупшыктымо деч кораҥден кертыт. Калыклан у административный ответственность пурталтеш- билет деч посна кайымылан да багажлан тӱлыдымылан ик тӱжем теҥге штрафым тӱлыктат. Тидын шотышто протоколым муниципал кокласе маршрутлаште транспорт министерствын, муниципал маршрутлаште верысе самоуправлений органлан уполномоченый еҥышт возаш праван улыт. Вашталтыш- влак законым савыктыме деч вара лу кече гыч вийым налыт.- умылтарат кугыжаныш Погынын аппаратыштыже.
