Юрий Зайцев калыклан приёмым эртарен
Марий Элым вуйлатыше калыклан приёмым эртарен. Юрий Зайцев деке толшо- влакын йодышышт корным да тӱвыра тӧнежын леведышыжым олмыктымо дене кылдалтыныт. Йошкар-Ола гыч Наталья Лебедева Ширяйково микрорайонысо Клара Цеткин уремысе кудывечылаште корнын пеш начар улмыжлан вуйым шийын. Воктенак школ, йоча сад верланеныт, но тушко пурымо корным шукертак олмыктымо огыл. Марий Элым вуйлатыше 30-шо август марте кудвече кумдыкым шотыш кондаш кӱштен. Советский район гыч Манефа Вершинина Топкайэҥер але Алексеевский посёлкысо тӱвыра пӧртын леведышыжым олмыкташ полшаш йодмаш дене миен. Йӱран годым вӱд йога, костюмым, аппаратурым пужа. Зданийыште книгагудо верланен, кружок, секций- влак пашам ыштат, телым йӱштӧ. Посна котельный тиде йодышым кораҥда ыле манын. Марий Элым вуйлатыше октябрь марте леведышым олмыкташ кӱштен. Юрий Зайцевын каласымыже почеш ырыктыме тургым марте Тӱвыра пӧртым газ дене ырыктымашке кусарат. Килемар посёлко гыч Тамара Черепанова шӱгарла деке намийыше корно нерген ойлен. Тудын кужытшо 860 метр, но пеш начар. Муниципал образованийын бюджетыштыже йодышым виктараш окса уке. Марий Элым вуйлатыше увертарен: олмыкташлан субсидийым республикын бюджетше гыч ойыралтеш. Пашам октябрь мучаш шуктымо лиеш манын.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
