Марий Элыште вольык продукцийым шукырак ыштен налме
Марий Элыште вольык продукцийым ыштен налмаш ешаралтын. Марий Элым вуйлатыше Юрий Зайцев ден ял озанлык да кочкыш сату министр Андрей Кондратенко вольык озанлыкын паша лектышыжым иктешленыт. Тенийсе индеш тылзыште 271 тӱжем тонн вольык ден сурт-кайыкым куштымо, Тидыже кодшо ийысе деч 6 процентлан шукырак. Шӧрым ыштен налмаш 5 процентлан ешаралтын да 179 тӱжем тонныш шуын. Тӱкан шолдыра вольык чотшат шукемын, шӧр лӱштышат ик ушкаллан шотлымаште шукырак лийын. Тудо куд тӱжемат 885 килограммыш шуын. Муным 373 миллион штукым налме да кодшо ийысе деч 1,3 гана утларак лийын. Чылаже тенийсе 9 тылзыште республикысе аграрий предприятий- влак ял озанлык продукцийым 37 миллиард теҥгелан ыштен луктыныт. Марий Элым вуйлатыше Юрий Зайцев палемден: аграрный секторын предприятийже- влак экологически ару кочкыш сатун тичмаш ассортиментшым ыштат. Республике кочкышым шкаланже гына огыл ситара, моло регионлашкат колта, йот эллашкат ужала.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
