«Майатул» 13-шо Тӱнямбал фестиваль умбакыже шуйна
Теҥгече финн-угор калык- влакын театрыштын «Майатул» 13-шо Тӱнямбал фестивальышт почылто. Фестивальын участникше да унаже- влакым Республикым вуйлатыше Александр Евстифеев саламлен. Тудо палемден: фестиваль лӱмлӧ событий вашеш почылтеш: 4-ше ноябрьыште Марий Элым ыштымылан 100 ий теммым палемдаш тӱҥалына. Куандара: республикына да тудын рӱдӧ олаже уэш финн-угор калык-влакын театр пашаеҥыштым ушен шогышо рӱдерыш савырнен. Тиде тыгак лийшаш. Марий кундем ойыртемалтше тӱвыралан, талантлан, тӱрлӧ театр коллективлан поян. «Майатул» манме мотор лӱмыштӧ фестивальын келге шонымашыже шыҥдаралтын: усталык тулым аралаш, пояҥдараш да калыкле тӱвыра йӱла- влакым вияҥден шогаш. Финн-угор театр-влакын драматургийыштышт акрет вожым умылаш тыршымаш, калыкын шӱм-чон поянлыкшым шымлаш да тудым почын ончыкташ тыршымаш шижалтеш. Ӱшанем: фестиваль умбакыжат усталык кылым вияҥдаш полша, у проект-влакым шочыкташ негыз лиеш. Чыла участниклан усталык кӱкшытым, а ончаш толшо- влаклан нӧлталтше кумылым тыланем,- ойлалтеш республикым вуйлатышын саламлымашыштыже.
