Ойган увер
Редакцийышкына ойган увер пурен. Теҥгече уста йылмызе, филологий шанче доктор, профессор Николай Исанбаевич Исанбаевын шӱмшӧ кырымым чарнен. Тудо 91 ийым темен ыле, Пошкырт кундем, Калтаса район, Ӱлыл Качмаш ялеш шочын. Краснокам педучилищыште, Марий пединститутышто, Москосо Языкознаний институтын аспирантурыштыжо тунемын. Тунем пытарыме ийыштак кандидатлык диссертацйиым арала да Языкознаний институтешак пашам ышташ кодат. Тушто ыштыше марий кокла гыч икымше улмаш. Языкознаний институтышто тыршымыж годым тудын илышыштыже ик куанле событий лийын – икымше совет йӱкан киношто модшо Йыван Кырлан ойлымыжым йӱкаҥдаш пиал шыргыжалын. Икмыняр ий гыч Николай Исанбаевич Йошкар-Олашке пӧртылеш да МарНИИ-ште пашам ышташ тӱҥалеш, тыгак пединститушто лекцийым лудеш. Николай Исанбаевын шымлымаш пасужо кумда, шанче саскаже пӧдыра. Тушто шӱдӧ утла шымлыме пашам савыктен. Кугу суапым ыштен Исанбаев лу томан «Марий мутерым» ямдылымаште. Марий шанчыште веле огыл келге кышам коден тудын «Марий йылмыш кӱсынлымӧ татар да башкир шомак-влак» мутерже. Николай Исанбаев Марий Элыште финн-угор шанче дене ик эн тале специалистлан шотлалтын. Николай Исанбаевич дене чеверласымаш эрла 12 шагатлан Йошкар-Оласе моргышто лиеш.
