Юмылан ӱшаныше- влак 120 меҥгым йолын ошкылыныт
Митрополит Иоаннын сугыньлымыж почеш, Оршанке район мучко 120 меҥге кужытым ырес дене ошкылмаш мучашлалтын. Кажне ийын погынышо- влак Юмынаван тӱрлӧ юмоҥаже дене ошкылыт. Тиде гана Оршанке посёлкысо черке гыч «Куанлан чыла ойгырышо-влакын» юмоҥаштым налыныт. Тений ошкылмо кужытым 10 меҥгылан ешарыме. Корныш Изи Кугунурысо у часамламат пуртымо. Ошкылшо- влак коклаште йоча гыч пенсионер ийготан марте еҥ- влак лийыныт. Верысе прихожан- влак дене пырля Йошкар-Ола да моло верла гычат паломник- влак ушненыт. Южыжо ошкылмашыш луымшо гана да утларакат лектын. Яллаште нуным пеледыш, кинде-шинчал, ӱстел сий дене вашлийыныт.
