Министр- влак кабинет «Калыкын чонжо» премийым калык усталыкым вияҥдымашке пыштыме надырлан кучыктен
Министр- влак кабинет «Калыкын чонжо» премийым калык усталыкым вияҥдымашке пыштыме надырлан кучыктен. Тидын шотышто распоряженийым правительствын сайтыштыже вераҥдыме. Марий Элын правительствыже «Калыкын чонжо» премийым калык усталык коллективлам, калык кидпаша сымыктыш колективлам вуйлатыше- влаклан пуэн. Калык куштымаш номинацийыште премийым «Онар» калык куштымаш йоча ансамбльым вуйлатыше Андрей Дмитриевлан пуымо. «Калык мурымаш» номинацийыште ветеран- влакын «Звениговысо ӱжара» калык хорыштын хормейстерже Светлана Вяткина палемдалтын. «Калык тӱвыра» номинацийыште премийым «Юл сем» фольклор ансамбльым вуйлатыше Анатолий Мартыновлан пуымо. «Изи памаш» образцовый фольклор ансамбльын концертмейстерже Родион Алексеев «Калык семӱзгар сем» номинацийыште палемдалтын. «Театр мастарлык» номинацийыште премийым «Рампа» калык театрын вуйлатышыже Татьяна Басова налын. «Декоративно- прикладной сымыктыш аланыште калык мастар» номинацийыште «Тӱрлымаш» студийым вуйлатыше София Крючковам палемдыме.
