Волжск ола администрацийыште еҥ-влакым «Тул гыч утарымылан» наградитленыт
Волжск ола администрацийыште еҥ-влакым «Тул гыч утарымылан» наградитленыт. Администрацийыште арня еда эртарыме планёрка торжественный тат гыч тӱҥалын- пожарыште лӱддымылыкым да чолгалыкым ончыктымылан саламлымаш гыч. Россий МЧС-ын «Тул гыч утарымылан» медальжым Юрий Зотовлан, Сергей Медведевлан, Александр Кузьминлан кучыктеныт. Кодшо ийын майыште Совхоз уремысе 17-ше пӧртыш тул пижын. Тушто шке коштын кертдыме, 1945-ше ийыште шочшо ӱдырамаш гына лийын, но тул лоҥга гыч полышым йодмо йӱкшӧ шоктен. Тораште огыл улшо пӧръеҥ- влак шонен шогыде полшаш пижыныт. Утарыше- влакым вучен шуктыде, окнам пудыртен пуреныт. Шикш дене темше шокшо пӧлемыште вакшыште кийыше ушым йомдараш тӱҥалше ӱдырамашым муыныт. Тыге тудым утарен коденыт. Нунылан сулен налме наградым Россий МЧС-ын Марий Элысе виктемжым вуйлатышын алмаштышыже Алексей Мельников кучыктен.
Фото: Кристина Изергина.
Фото: Кристина Изергина.
