Ончыкылык тукымлан Йошкар- Олан ужар вургемже аралалт кодшаш
Общероссийский калык фронтын чолга еҥыштын тыршымыштлан кӧра, Йошкар-Ола йыр «ужар авыртышым» ыштыме. Кугыжаныш Погынын депутатше- влак шке сессийыштышт рӱдӧ ола йыр «чодыра-парк ужар ӱштым» ыштыме нерген законым пеҥгыдемденыт. Общественник- влак тиде йодышым кок ий утла виктарен колташ тыршеныт. «Ужар щитын» радамышкыже Медведево районысо 17 тӱжем гектар кумдык участке- влак пуреныт. Чекым ышташ кадастар пашан ончылгоч шотлымо акше ик миллионат 400 тӱжем теҥгеш шуэш. Тудым бюджетыште палемдыме. Сомылым 180 кече жапыште ыштен шуктыман. Общественник- влак «ужар щитым» ышташ ямдылалтме пашам 2017-ше ий шыже годсек шуктеныт. Йодышым ик гана веле огыл Республикым вуйлатыше лӱмеш колтымо тӱшка темлымаш спискыш пуртымо. Тыге у закон дене ончыкылык тукымлан олан ужар вургемже аралалт кодшаш. Тушто пушеҥгым руаш, чоҥаш ок лий, улшо эҥер ден ер-влакат аралымашке налалтыт.
