Таче Шкетан лӱмеш марий театрлан- 100 ий

Таче Шкетан лӱмеш марий театрлан- 100 ий
Таче Марий калык ик эн кугу лӱмгечым пайремла- Шкетан лӱмеш марий калыкле драма театрлан 100 ий темеш. Тидын лӱмеш театрыште пайрем  мероприятий эрта. Тушко театрын коллектившым да уло калыкым кугу пайрем дене саламлаш республикым вуйлатыше Александр Евстифеев миен. Тудо ятыр поро мутым ойлен да театрлан у автобусым налаш сертификатым кучыктен. Артист- влак тӱрлӧ гастрольыш да кугу мероприятийлаш у чапле автобус дене коштын кертыт. Марий Элым вуйлатыше тыгак ойыртемалтше театр пашаеҥ- влаклан Кугыжаныш наградым кучыктен. «Марий Эл тӱвыран сулло пашаеҥже» лӱмым театрын радиоцехшым вуйлатыше Эдуард Копцевлан пуымо. Марий Эл правительствын чап грамотыжым артист- влак Павел Ефимов ден Галина Иванова налыныт. Марий Элым вуйлатышын тауштымашыж дене театрын пашаеҥже- влак Эдуард Байгузин, Надежда Бурлакова, Нина Копцева, Игорь Павлов, Алеся Семёнова, артист- влак Алексей Сандаков, Алексей Тетерин, Светлана Филиппова палемдалтыныт. Торжественный ужаш деч вара артист- влак чапле пайрем концертым ончыктеныт. 

Прошлые выпуски