Марий Элым вуйлатыше Кугыжаныш Погынын бюджет сессийыштыже лийын
Марий Элым вуйлатыше Александр Евстифеев теҥгече Марий Эл Кугыжаныш Погынын визымше бюджет сессийыштыже участвоватлен. Республикын бюджетше нерген йодышым ончымеке, тудо мутым налын да тӱҥ финанс документым приниматлыме дене чылам саламлен. Тиде документ пеш кӱлешан, - каласен тудо. Правительствылан мом ыштыме нерген уло мом каласкалаш. Республикыш ятыр окса пура, промышленный производство, ял озанлык вияҥеш, бюджетын социал корныжо аралалт кодеш. Тидын дене ӱчашаш ок лий. Александр Евстифеев депутат- влакым сай лектыш дене пашам ышташ ӱжын ойлен. Сессийыште чылаже 16 йодышым ончен лектыныт. Тӱҥ йодышыжо- ончыкылык кум ийлан республикым социально-экономически вияҥдыме прогноз ден республикын да обязательный медицина страхований фондын бюджетше. Шушаш ийлан бюджетын парыш ужашыже 35 миллиардат 400 миллион теҥге лиеш, 21-ше ийлан 33 миллиард, 22-шо ийлан 31 миллиард утла теҥге. Роскотшат тынарак лийшаш. Тыге шушаш ийын бюджет дефицитдыме лиеш, ончыкылык кок ийыштыже парышыже роскот деч кугырак лийшаш. Тыгак сессийыште приниматлыме кӱлешан йодыш- айдемын праваже шотышто уполномоченныйым пеҥгыдемдымаш. Шолып йӱклымаш почеш, тиде должностьыш Фанис Мухаметгалиевым шогалтыме.
