Опекун инвалид ӱдырым окса деч посна коден

                Опекун инвалид ӱдырын счётшо гыч оксам кусарен да Йошкар-Олаште шкаланже пачерым налын. Социал вияҥмаш министерстве кугу ак дене ондалкалымылан ведомствышкыжо пурышо тӧнежын ончычсо пашаеҥжым мут кучаш шогалташ тӱҥалтышым ыштен. Тений январьыште психоневрологий интернатыш у ӱдырым конденыт. Рашемын: ийготыш шумешкыже ныл тылзе ончыч социал тӧнежыште ончыч пашам ыштыше ӱдырымашлан опекыш пуэныт. Тудо тулык улеш, уш-акыл шотышто черже уло, изи годсек интернат пӧртыштӧ илен. Опекун ешыште 7 тылзе лийын. Интернатлаште илымыж годым инвалид шотышто пенсийже счётышкыжо погынен. Молан манаш гын, интернат- пӧртыштӧ илыше- влакым кугыжаныш яра онча. Тыге счётыштыжо кок пӧлеман пачерлан ситыше окса лийын. Кугыеҥ- влаклан психоневрологий интернатыш кондымеке счётыштыжо улыжат 7 тӱжем теҥге лийын. Тидыже интернатыште ыштыше- влакым ӧрыктарен. Сандене нуно чыла рашемдаш тӱҥалыныт.
              Опекыш налше ӱдырамаш ӱдырын 18 ияш лиймекыже доверенностьым шке ӱмбакыже возыктен, счётшо гыч ик миллионат 767 тӱжем теҥгем луктын, кок миллион наре теҥгеаш пачерым налын да шкаланже возыктен. Ӱдырым эсогыл прописатленат огыл. Оксажым налмеке, ӱдырамаш ӱдырым психиатрический эмлыме верыш да  интернатыш возыктен да уэш кугыжанышын опекышкыже пуэн. Тиддеч вара кодшо шым тӱжем теҥгежымат поген налын.
             Уголовный пашам тарватыме. Тудо йоҥылышыжым умылен. Йошкар-Оласе суд ӱдырамашым кум ийлан условно судитлен. Налме пачержым суд пристав службо гоч ужалат да оксажым ӱдырлан мӧҥгеш пӧртылтат.

Прошлые выпуски