Палыдыме еҥ 65 ияш пӧръеҥын 35 тӱжем долларжым шолыштын
6-шо гыч 12-шо март марте Волжск ола да район мучко 13 осал пашам регистрироватлыме. Нунын кокла гыч шукыжо еҥ погым шолыштмаш да банк карте гыч ондалкален оксам налмаш дене кылдалтын. Лу осал пашажым рашемдыме. 2018-ше ий 12-шо ноябрь гыч тӱҥалын, тений 15-ше февраль марте палыдыме еҥ Волжск оласе Дружба уремыште ик пачерыш шолып пурен, 35 тӱжем долларым шолыштын да шылын. Тыгай эҥгекым 65 ияш пӧръеҥлан ыштымыжлан Уголовный пашам тарватыме. 4-ше мартыште ик еҥ ювелир кевыт гыч 12 тӱжемат 300 теҥгеаш шӧртньӧ шергашым наҥгаен. Тудым кучымо. 11 –ше мартыште йодмаш пурен: эше 21-ше февральыште пачер гыч, 44 ияш ӱдырамашын плащ кӱсенже гыч телефоным, сравочым да тӱжем теҥгем солалтеныт. Чылаже 7 тӱжем утла теҥгеаш эҥгекым ышталтын. Тудымат мумо: ондак судитлалтше, 54 ияш ӱдырамаш улмаш. Чыла шотыштыжат уголовный пашам почмо.
