Петров урем гыч вик Шернур корныш лекташ йӧным ыштат
Йошкар-Олаште Петров уремым умбакыже чоҥымо шотышто кугу проект тӱҥалеш. Тиде пашам шукташ подряд организацийым ойырен налме шотышто электрон аукционым увертарыме. Чоҥымо паша Интернационалист воин- влак урем деч Шернур корно марте шукталтшаш. Тӱҥалтыш акше 332 миллион теҥгеш шуэш. Тиде проектым шыҥдараш йӧн кундемнам социал-экономик вияҥдыме индивидуальный программе почеш федерал да республикын окса полышыштлан кӧра лектын. Проектыш, йӱр вӱдым йоктарен колтымо канализаций, уремым волгалтарыме системым пужен ыштымаш, асфальтым шарымаш пурат. Тыгак тротуар- влакым олмыктат, светофорым вераҥдат. Пашам шушаш ийын икымше ноябрьлан мучашлышаш улыт.
