Йошкар-Оласе 7-ше школ йӧршын уэмеш

Йошкар-Оласе 7-ше номеран школышто кугурак класс-влакын верланыме зданийым капитально олмыктен шуктымо. Тушко олан мэрже Евгений Маслов, туныктыш министерствын да оласе туыктыш виктемын еҥышт миеныт. Шымше школ олаште ик эн тоштылан шотлалтеш. Октябрьыште кыдалаш школын зданийыштыже олмыктымо пашам мучашлыме, тунемше- влак шке классышкышт пӧртылыныт. Школым олмыкташ тений 105 миллион теҥгем ойырымо ыле. Тиде школышто тӱжемат 300 йоча тунемеш. Тӱҥалтыш класс- влакын тунемме зданийыштым 1939-ше ийыштак чоҥымо, а кыдалаш звенош пурышо класс- влакын зданийышт 1978-ше ийыште чоҥалтын. Чоҥышо-влак леведышым, электротулым, вӱдым ситарыме, канализаций системым, сантех оборудованийым, шокшым да шокшо вӱд толмо системым вашталтеныт, пырдыжым, кӱварым, тувырашым уэмдыме, окна ден омсам вашталтыме, фасадыште паша мучашлалтеш. Школ пӱтынек уэмеш. А тӱҥалтыш класс- влакын тунемме корпусышто паша ноябрь мучаш марте ыштен шукталтшаш. Тичмаш налмаште тушто пырдыжше гына кодеш, чыла молыжо уэмеш. Тыге ме йӧршын гаяк у школым налына. Тудо моткоч кӱлешан. Регион- влаклан тыгай полышым пуышо федерал программын  улмыжо моткоч куандара,- каласен олан мэрже.

Прошлые выпуски