Рӱдӧ оласе эмлыме верын зданиешыже йоча хирурглан шарнымашан оҥам пижыктеныт

Рӱдӧ оласе эмлыме верын зданиешыже йоча хирурглан шарнымашан оҥам пижыктеныт
            Рӱдӧ оласе эмлыме верын зданиешыже йоча хирурглан шарнымашан оҥам пижыктеныт. Республикысе йоча клинический эмлыме верын пырдыжешыже республикыштына кумдан палыме врач-хирург Геннадий Заболотскихлан шарнымашан оҥам вераҥдыме. Геннадий Харитонович 1941-ше ийын 6-шо январьыште Параньга районысо Памашъялыште шочын. Озаҥысе медицине институтым тунем пытарымеке Косолоп участковый эмлыме верын педиаторжылан, Оршанке, Йошкар-Ола эмлыме верлан хирургшылан пашам ыштен, Йошкар-Ола эмлыме верын хирургий пӧлкажым вуйлатыше лийын. 1983-шо гыч 2001-ше ий марте Республикысе йоча эмлыме верыште тыршен, торакально-хирургий да хирургий пӧлкам вуйлатен. Тиддеч посна тазалыкаралтыш министерствын внештатный тӱҥ йоча хирургшо лийын. Йоча хирургий службым негызлен, 57 врач-специалистым ямдылен,- увертара тазалыкралтыш министерстве. Теҥгече шарнымаш оҥам почмаште тазалыкралтыш министрын алмаштышыже Татьяна Бастракова Геннадий Заболотских нерген ойлышыжла тудын кӱкшӧ профессионализмжым да пашажлан ӱшанле улмыжым палемден. Врачын эргыже шарналтен ойлен да ачаже нерген шарнымашым аралымыштлан, эмлыме верым вияҥдымашке пыштыме надыржым аклымылан таум каласен.
           Фото: Тазалыкаралтыш министерстве.

Прошлые выпуски