Рӱдӧ олаштына тӱвыра пашаеҥ- влак 2022-шо ийысе пашам иктешленыт
Рӱдӧ олаштына тӱвыра пашаеҥ- влак 2022-шо ийысе пашам иктешленыт. Тудо Йошкар-Олан историй тоштерыштыже эртен. Ола администрацийын тӱвыра виктемжым вуйлатыше Надежда Логинова каласен: эртыше ийын тӱвыра пашаеҥ- влак тӱрлӧ проектлам илышыш шыҥдареныт. Сеҥымашын 30-шо идалыкше лӱмеш тӱвыра полат тӱвыра инициативын президент фондшын конкурсыштыжо сеҥышыш лектын да «Тӱвыра- калыклан. Олаште илыше- влаклан усталык лабораторий- влак» проектым шыҥдарен. Ленин лӱмеш тӱвыра полат тӱвыра министерствын полшымыжо дене «Чон мура, гармонь шокта» регион- влак кокласе кӱкшытан фестивальым эртарен. Тидымат пелемдыме: эртыше ийын материально-техник базым пеҥгыдемдаш ола бюджет гыч 29 миллион утла теҥгем ойырымо, кокымшо номеран йоча сымыктыш школлан семӱзгарым да тунемме литературым налаш кок миллион теҥгем пуымо. Тений калыкле проект кышкарыште Йошкар-Олаште моделян кокымшо книгагудо ышталтеш. Олан историй тоштерже технически пойдаралташ федерал субсидийым налеш. Тӱвыра министр Константин Иванов погынышо- влаклан тауштен да тенийлан палемдыме мероприятий- влакат илышыш шыҥдаралтыт манын ӱшаным каласен.
Фото: Тӱвыра министерстве.
Фото: Тӱвыра министерстве.
