Марий Эл гыч продукт- влак Санкт-Петербургын кумылжым савыреныт
«Изи бизнеслан- кугу шӧрлык!» Санкт-Петербургышто тыгай лӱм дене предпринимательстве аланыште икымше конференций эртен. Марий Эл гыч продукт- влак Санкт-Петербургын кумылжым савыреныт. Санкт-Петербургышто эртыше конференцийыште изи бизнес ден кугу ритейл кокласе вашкылым каҥашыме. Тушто фермер да изирак тӱшка дене сатум лукшо- влакын продукцийышт полшымо дене кугу кевыт сетьлан ассортиментыштым кузе писын да куштылгын пойдарыме нерген мутланеныт. Конференцийыште Федераций Советым вуйлатышын икымше алмаштышыже Андрей Яцкин, федерал антимонополий службын вуйлатыше Максим Шаскольский, промышленность да торговля, ял озанлык министерствылан еҥышт, Кугыжаныш Думын депутатше, Икс5Группын президентше Екатерина Лобачёва лийыныт. Марий Эл деч Ял озанлык министерствын, компетенций рӱдерын, Хладокомбинатын, Икымше кинде заводын, Шернур сырзаводын, «ЗаАзяково» Экофермын, «Лина» ушемын, «Агропродукт» предприятийын еҥышт лийыныт. Конференций деч посна торгово-закупочный сессий лийын. Вуйлатыше да почётан уна- влак марий фермер да изи производитель- влакын сатуштым кӱкшын акленыт. Марий Элын делегацийже «Пятёрочка», «Перекрёсток» кевытлан сатум шеледыме рӱдерышкыже миен да сатун поставщик деч кевыт шӧрлык марте коштмо кылжым эскереныт. Сессийыште республикысе сатум лукшо- влак Х5Группын еҥже- влак дене вашкыл да ритейлерын кевыт шӧрлыкышкыжӧ сатум колтымо йӧным каҥашеныт да икмыняр келшымашке шуыныт.
Фото: Ял озанлык министерстве.
Фото: Ял озанлык министерстве.
