Республикыште вич ондалалтше дольщик кодын

Марий Элысе кучем органын чолган тыршымыжлан кӧра, ондалалтше дольщик-влакын проблемышт сайын виктаралтеш. Тачысе кечылан тыгай вич еҥ гына кодын. Тыгай статистика Правительстве пӧртыштӧ илыме верым чоҥымаш да пӱсын шогышо йодыш- влакым каҥашыме кугу совещанийыште йоҥген. Ме илыме верым чоҥымо отрасльым вияҥдыме, калыкле проект- влакым шыҥдарыме, ондалалтше дольщик- влак нерген ойлена. Пытартыш йодышыжым ме мучашлена, тудо тетла ок лек манын ӱшанем, - каласен республикым вуйлатыше. Погынымаште тыгак чоҥашлан оксам у семын ойырымо йӧн- эскроу-счётышто шийвундым чумырымо нерген ойлымо. Шке оксам пыштен пачерым чоҥаш шонышо да ондалалтше- влакын праваштым пӧртылтымӧ нерген республикысе чоҥымаш министрын алмаштышыже Константин Хижняк ойлен. Кодшо ийысе 1-ше январьлан 116 ондалалтше дольщик шотлалтын. Тушечын 111 еҥже йодышым виктарен колтен. 17-ше оксам налын, икмыняр еҥ йодышыжым кораҥден, 85 еҥ пачерым налын. Тыге проблеман ик пӧрт гына кодеш. Тушто вич дольщик шотлалтеш. Но моло йодышат ятыр. Пачерым налше- влак тудым регистрироватлен огыт керт. Молан манаш гын, ик органиазций чоҥаш тӱҥалын, весе чоҥен пытарен. Вес йодыш эскроу-счётышто оксам чумырымо дене кылдалтын. Чоҥышо шке оксаж дене чоҥышаш але кредитым налшаш. А кредит гыч процентым тӱлыман. Тидыже пачерын акшым кугемда. Сандене тиде погынымашке республикым вуйлатыше банкынат, чоҥышо-влакынат еҥыштым иквереш чумырен. Нуно келшыше йӧным муын, пашам виктараш кутырен келшеныт.

Прошлые выпуски