Республикыштына теҥгечысе кече гыч чот ямдылалтме режимым пуртымо

Республикыштына короновируслан кӧра теҥгечысе кече гыч чот ямдылалтме режимым пуртымо. Инфекций ынже шарле манын, тыгай режмым пурташ решенийым Александр Евстифеев луктын. Тидын нерген теҥгече кастене республикысе правительствын черетдыме заседанийыштыже увертарыме да лӱмын Указым пеҥгыдемдыме. Документ дене келшышын, 15-ше апрель марте республикыште 50 еҥ деч шукырак погыныман спорт, тӱвыра да моло тӱшка мероприятий-влакым эртараш чарыме. Тиддеч посна 21-ше март гыч 12-шо апрель марте школ, профессионал, ешартыш шинчымашым пуышо тӧнежлашке кошташ чаралтеш. Тидын годым, ача-ава- влакын решенийышт лиеш гын, 1-ше гыч 4-ше класс марте тунемше- влаклан пашам ыштыше дежурный группым ыштыман. Тушто санитар режимым эскерыман. Граждан- влакланат обязательствыштым ушештарыме. Чер шарлыман йот эллаш миен толшо- влак «шокшо линийыш» шкешт нерген увертарышаш улыт. Чер палдырнаш тӱҥалын гын, вигак медицина полышым йодман. Пашам пуышо- влак паша верыште шке пашаеҥыштын температурыжым висышаш улыт, помещенийлаште дезинфекцийым эртарыман. Республикым вуйлатыше тыгак кевытлаште ситуацийым эскераш, кочкыш чатум жапыштыже конден шогаш да умылтарыме пашам эртараш кӱштымӧ. Элыштына кочкыш сату ситышын уло. Республикыштына короновирус инфекцийым регистрироватлыме огыл.

Прошлые выпуски