Республикым вияҥдыме шотышто индивидуал программын тӱҥ пунктшо- влакым тений шуктымо лиеш

              Республикым вияҥдыме шотышто индивидуал программын тӱҥ пунктшо- влакым тений шуктымо лиеш. Марий Элым вуйлатыше Александр Евстифеев Россий Федерацийын экономически вияҥмаш министрже Максим Решетниковын эртарыме совещанийыште участвоватлен. Тудо видеоконференцкыл йӧн дене лийын. Могай кундемыште тений гыч индивудал вияҥме программе шыҥдаралтеш гын, нуным вуйлатыше- влак чыланат видеокылыш лектыныт. Максим Решетников палемден: тиде программе пеш кӱлешан инструментлан шотлалтеш да кажне регионышто шуктышаш мероприятий- влакын перечньыштым ыштыме. Программым вич ийлан палемдыме. Элын правительствыже тудым илышыш пурташ кажне регионлан ик миллиард теҥге гыч пуэн. Тений 36 мероприятийым ыштен шуктышаш улыт, тӱжемат 200 пашавер почылтшаш. Марий Элыште тиде программе кышкарыште тенийлан лу мероприятийым палемдыме, визытшылан гына окам ойыраш палемдыме. 18-ше декабрьлан тенийсе лимит гыч 86 процентшым кучылтмо. Кок меропртяийже дене 100 процентлан шуктымо. Тенийсе задаче тӱрыс шукталтеш. Лач кызыт гидрологий да изыскатель пашам ышташ лийдымылан кӧра, ныл миллион утла теҥге кучылталтде кодеш. Тиде причалым чоҥымо дене кылдалтын. Окса октябрь мучашыште гына пурен. Вӱд гыч пашам виктараш ок лий. Сандене окса мӧҥгеш кая да вес ийын уэш толеш. Тиддеч посна шушаш ийын ик тӱҥ пашалан Волжск олаште азам ыштыме пӧртым чоҥымаш шотлалтеш. Тудлан подрядчикым ойырымо. Моло йодышымат виктарен колтымо, проблеме уке, -каласен Александр Евстифеев. Российысе чоҥымаш министерстве могырым программым шуктымо шотышто замечаний пурен огыл.

Прошлые выпуски