Республикысе район-влак коммунал технике дене пойдаралтыт
Республикысе район-влак коммунал технике дене пойдаралтыт. Ола ден селаласе уремлам арун кучаш, чоҥаш, коммунал сферылан специализированный технике районлашке толынак шога. У коммунал техникым эше икмыняр район налын. Тиде сомыл республикым вияҥдыме индивидуал программе кышкарыште шукталтеш. Мутлан, автогрейдер, лумым эрыктыше установко, вакууман машина, йӱшаш вӱдым кондаш цистерне дене Советский район пойдаралтын. У Торъял районыш 8 миллион утла теҥгелан вакууман машина ден экскаватор-погрузчикым налме да Водоканаллан пуымо. А ешартыш оборудованиян, косилкан, ошмам шавме йӧн дене у «Беларус» тракторым У Торъял жилсервислан пуымо. Марий Турек район 12 миллион утла теҥгелан экскаваторым налын, кодшо кечылаште кок ассенизатор машина ден УАЗ автомобильым кондымо. Тиддеч ончыч Волжскысо Водоканалат у техникым налын ыле.
