Республикысе корно лӱдыкшыдымылыкым ыштыме шотышто Правительстве комиссийын черетан заседанийже лийын

Республикысе корно лӱдыкшыдымылыкым ыштыме шотышто Правительстве комиссийын черетан заседанийже лийын
            Республикысе корно лӱдыкшыдымылыкым ыштыме шотышто Правительстве комиссийын черетан заседанийже лийын. Тудым Правительстве вуйлатышын алмаштышыже  Наталья Ошланова эртарен. Погынымаште тыгай йодыш- влакым ончымо: корно лӱдыкшыдымылык шотышто мероприятий- влакым тений шыҥдарыме годым  палемдыме показательыш шумаш. Республикысе корнылаште тений шым тылзыште 372 ДТП-м регистрироватлыме. Тидыже кодшо ийысе тыгаяк жап дене таҥастарымаште 15 процентлан шукырак. Тушто 48 еҥ ӱмыр лугыч лийын. Тушечын федерал корнышто 10, регионысо сетьыште- 21, верысе корнылаште 17. Кодшо ийысе деч 84 процентлан шукырак. Тидын годым 465 еҥ эмганен, 15 процентлан шукырак. Колымашан ДТП-н амалже- скоростьым чын ойырен налдымаш, кудал эртыме годым черетым эскерыдымаш, ваштареш корныш кудал лекмаш, йолешке- влакын корно правилым пудыртымышт, йолешке вончемым кудал эртыме правилым, светофорын йодмыжым шуктыдымаш. Профилактике шот дене тунемме тӧнежлаште эре мероприятий, лекций, вашлийын мутланымаш- влак эртаралтыт.
            Корно пашалан тений вич миллиардат 500 миллион утла теҥгем ойырымо. Тушечын кок миллиард утлаже федерал бюджет гыч. Шындыме задачым шукташлан контракт- влакым пеҥгыдемдыме. Тудын почеш 65 объектыште паша шукталтеш. Тиддеч посна регион кӱкшытан автомобиль корнын лу ужашыжым пашаш колтымо, ола агломерацийыште- кум объектым да шым кӱварым. Икымше августлан шотлымаште корно лӱдыкшыдымлыкым ышташлан 242 фото-видео-фиксаций камере- влак пашам ыштат, шериф-балке- влак вераҥдалтыт, корным волгалтарыме да тротуарым ыштыме паша шукталтеш, корно разметке- влак ышталтыт, скоростьым иземдыме нерген пале- влак вераҥдалтыт да молат. Йодышым каҥашыме лектыш почеш министерстве ден ведомство, организаций- влаклан шуктышаш паша- влакым темлыме.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски