Республикыште лум поран чот гӱжлыш

                   Шуматкечын да рушарнян республикыштына лум чот лумын, поран ӱштын, ятыр корным петырен, машина дене коштшо- влаклан йӧндымылык лектын. Теве тыгай игечылан верч Моско гыч Йошкар-Олаш чоҥештыше самолётат Йошкар-Ола аэропортыш шинчын кертын огыл. Южышто кок шагатат пеле чоҥештылмеке, Озаҥ олаште шинчаш пунчалыныт. Йошкар-Ола гыч Москош кайыше самолётын рейсшым икымше февральыш кусарыме.
                   Теҥгече Марий Элысе Кугыжаныш автоинспекций водитель- влакым шижтарен: начар игече, лум да поранлан кӧра Татарстан кундемыш логалаш ок лий. Чыла пассажир автобус да грузовой транспортлан Татарстан кундемыште 9 шагат кас гыч игече тӧрланымеш кошташ чарыме ыле.
                   Каныш кечылаште Йошкар-Олаште лум чот лумын, тылзаш нормын 18 процентше возын. Тыге коммунал слубжылан ешартыш паша лектын. «Город» МУП-ын урем корным кучаш 80 спецтехникыже уло. Нуным эрыктымашке лукмо, моло предприятий гычат транспортым ӱжмӧ. Корным эше удан огыл эрыктат гын, Йошкар-Оласе ятыр кудывече, тусо корно да тротуар- влак кызытат лум дене темше улыт. Виктарыше компаний- влак лумым эрыктыше техникым ӱжаш огыт вашке. Лумым эрыктыме да корным кӱлеш семын кучымо шотышто пашам писын виктарен колташ «Город» МУП-ын диспетчер службышкыжо 45-24-95 номеран телефон дене йыҥгырташ лиеш. Кевыт, торгайыше рӱдер, аптеке, полышым пуышо организаций- влак шке воктелсе кундемыштым 15 метр кужытышто арун кучышаш улыт.

Прошлые выпуски