Республикыштына илаш йӧрыдымӧ пӧртла гыч калыкым писынрак кусараш тӱҥалыт
Республикыштына илаш йӧрыдымӧ пӧртла гыч калыкым писынрак кусараш тӱҥалыт. Чоҥымаш министерстве тидын шотышто ешартыш соглашенийым пеҥгыдемден. Ушештарена: ондак тиде кусарыме программе куд йыжыҥлан шелме ыле. Тудын дене келшышын черет мучашыш логалше еҥ- влак 2025-ше ий 1-ше сентябрьлан кусаралтшаш улыт. Пашам писемден колташ манын, ешартыш соглашенийым ыштыме. Тудо калыкым 2023-шо ий 31-ше декабрь марте кусараш йӧным пуа. Тиде жаплан шым тӱжем утла еҥлан у илыме верым пуыман да 102 тӱжем квадрат метр аварийный пӧртым кораҥдыман. 10-шо декбрьлан шотлымаште Марий Элыште тошто пӧртла гыч 351 еҥым кусарыме, шым тӱжем квадрат метр аварийный пӧртым пытарыме. Идалык мучаш марте Йошкар-Олаште, Звениговышто. Советскийыште у пӧртлаш эше 487 еҥ кусна. Тидын нерген республикын чоҥымаш министерствыже увертара.
