Республикыштына марий йылмын антонимже- влак мутерым ыштат
Республикыштына марий йылмын антонимже- влак мутерым ыштат. Кугыжаныш йылме- влак шотышто Правительстве комиссийын черетан заседанийже лийын. Тудым Правительстве председательын икымше алмаштышыже Михаил Васютин эртарен. МарНИИЯЛИ-н директоржо Людмила Григорьева институтын марий йылме корпусшым да марла ойлымо аудиокорпусым ыштымыже нерген ойлен. Тудын мутшо почеш, 2020-шо ийыште марий йылмын калыкле корпусшым ыштыме шотышто проектым тӱҥалме. Тудын негызеш «Марий йылмын таҥастарыме мутержым», «Марий йылмын эпитет мутержым» ыштыме. Тений «Марий йылмын антоним мутержым» чумыраш тӱҥалме. Ончыкылык задаче семын Людмила Григорьева чаплын войзашлан видеостудийым ыштымым, прикладной филологий лабораторийым почмашым, Марий йылмын калыкле корпусшым да аудиокорпусшым ыштыме пашам писемден колтымым палемден. Калыкле тӱвыра да тӱвыра кокласе коммуникаций Институтын директоржо Родион Чузаев Марий университетыш тунемаш налме контрольный цифре нерген ойлен. Тений «Педагогике шинчымаш» корно дене «Шочмо йылме де литература, йот йылме аланыште туныктымаш» да «Этнокультурный средаште филологий шинчымаш» профиль дене 30 еҥым тунемаш налыт. «Этножурналистикын филологий негызше» профиль дене куд бюджет верыш налаш увертарыме,- каласен Родион Чузаев. Мучашлан комиссийын еҥже- влак Козьмодемьянскыште да Курык марий районышо мер кӱлешан уверым савыктыме годым йылме- влакым кучылтмо йодышым каҥашеныт, - увертара тӱвыра министерстве.
Фото: Тӱвыра министерстве.
Фото: Тӱвыра министерстве.
