Российысе калык перепись марте кок тылзе наре жап кодын

                   Российысе калык перепись марте кок тылзе наре жап кодын. Тудо икымше апрельыште тӱҥалеш да тыглай йодыштмаш деч посна цифран форматым кучылташ тӱҥалеш. Теҥгече переписьым эртарыме шотышто  комиссийын заседанийже лийын. Тудым Правительстве председательын икымше алмаштышыже Михаил Васютин вӱден. Видеоконференций йӧн дене заседанийыште тыгак муниципал образованийла гычат вуйын шогышо еҥ- влак участвоватленыт. Тӱҥалтышыште Республикым вуйлатыше Александр Евстифеевын кӱштымыж почеш Михаил Васютин Маристатым вуйлатыше Александр Целищевлан «Марий Элым ыштымылан 100 ий» шарнымашан медальым кучыктен. Маристатым вуйлатыше ушештарен: пандемийлан кӧра переписьым 2021-ше ийыш кусарыме ыле, ме пашам тӱҥалаш ямде улына, манын. Кызыт кажне илемын картшым, пӧрт адрес- влакын спискыштым ыштыме, планым ямдылыме, перепись да стационар участке- влакым вераҥдаш пӧлем-влакым ыштыме. 80 процент пӧлемже пашам тӱҥалаш ямде. Республикыште калыкым возен налмашке тӱжемат 800 утла еҥ ушнышаш. Нунылан тунеммашым эртарат. Переписчик- влаклан экипировка тӱрыс толын, маскым, перчаткым, термометрым кондышаш улыт. Ола да районлаште урем лӱмым, пӧрт номерым ончыктышо табличке- влакым пӱтынек вераҥдыме. Михаил Васютин пашам районлаштат писемден колташ, калык дене умылтарыме пашам эртараш,  тора гыч ыштыме сервис дене кузе пайдаланаш инструкций ден памяткым ямдылаш кӱштен.

Прошлые выпуски