Такси- влакым тергыме
Такси- влакым тергымаш лектышым ончыктен. 26-шо гыч 28-ше январь марте республикыште «Такси» оперативно- профилактик мероприятий эртаралтын. ГИБДД пашаеҥ- влак калыкым шупшыктымаште законодательствым пудыртымашым кычалыт да чараш тыршат. Тергыме икымше кечын кугыжаныш автоинспектор- влак 126 легковой таксим онченыт да 61 нарушенийым рашемденыт. Вес кечынже 260 правонарушенийым рашемдыме да руль воктеке йӱшӧ вуя шичше ныл водительым пален налме. Илем деч ӧрдыжтӧ пычкемыш жапыште машина тулым мӧҥгеш волгалтарыше элементым кучылтдымылан 9 йолешкым мут кучаш ыштыме. Тыгак 74 автобусым тергыме, кум нарушенийым палемдыме. Кугыжаныш регистраций номерын койдымыжлан 16 водительым мут кучаш ыштыме.
