РЖД Марий Элын казнашкыже 39 миллион теҥге оксам кусарен
Россий кӱртньӧ корно холдингын предприятийже- влак Горький кӱртньӧ корно кундемыште Марий Элын регионысо да верласе бюджетышкыже кодшо ийлан 39 миллион теҥге оксам кусареныт. Горький кӱртньӧ корнын верланыме Российысе субъектлан консолидированный бюджетышкышт кусарыме налог оксан тичмаш кугытшо эртыше ийын 13 миллиард теҥгем эртен. Мутлан, Угарман область 8 миллиард утлам налын, Татарстан ик миллиардат 200 миллионым, Киров область 898 миллионым, Владимир Область 764, Удмурт республике 648 миллионым, тыгак Чуваш, Башкортостан республике, Свердлов область налыныт. Марий Эллан 39 миллион теҥге логалын. Горький кӱртньӧ корно налогым тӱлышӧ кугу предприятий улеш, верысе бюджетлашке оксам тичмаш колта.
