Рушарнян республикыштына черетан Тазалык да спорт кече эрта
Шушаш рушарнян, 31-ше январьыште, республикыштына черетан Тазалык да спорт кече палемдалтеш. Тудым 2019-ше ийыште республикым вуйлатыше шке Указше дене пеҥгыдемден. Тиде кечын шуко шочшан еш, инвалид, инвалид йоча- влак, ашнаш налме ешлаште илыше йоча-шамыч, тулык пӧртлаште илыше, начар тазалыкан- влаклан организацийыште шуаралтше йоча, пенсионер, сарын ветеран ден инвалидше, верласе сарлаште лийше ветеран ден инвалид, пашан ветеранже, политрепрессийыш логалше да моло- влак спорт оралтылаш оксам тӱлыде миен кертыт. Лач документым веле ончыкташ кӱлеш. Тыгак профилактике учётышто шогышо самырык тукымым физкультура да спорт деке шӱмаҥдаш манын, нунымат яра пуртат. Тиде кечын нунылан «Йошкар-Ола» Ий полат, Вӱд спорт полат, «Дружба» стадион, «Марий Эл Арена» манеж, районласе спорт полат ден комплекс- влак яра пашам ыштат.
