Озаҥыште тӱнямбалсе самырык профессионал- влак таҥасеныт
Теҥгече Озаҥ олаште самырык профессионал- влакын «Уорлдскилс Казан» 45-ше Тӱнямбал чемпионатышт мучашлалтын. Марий Эл гычат ӱдыр- рвезе- влаклан пашаче профессий, таҥасымаш шӱлыш дене пойдаралтше пайремыш мияш пиал логалын. Ӱчашыме ныл кече жапыште Йошкар-Ола, Волжск ола, Морко да Волжский районла гыч 200 тунемше миен. Нуно чыла специальность дене эртыше таҥасымашлашке экскурсий дене коштыныт, мастар- влакын пашаштым эскереныт, шке кид дене тӱрлӧ ӱзгарым ыштен онченыт, сувенирым налыныт. Чемпионатын деловой программыжат пеш поян лийын. Тушто Марий Элын туныктыш министрже Наталья Адамован вуйлатыме делегацият участвоватлен.
