ГИБДД инспектор вӱд гыч пӧръеҥым луктын
Морко посёлкысо Энсул ерыште ГИБДД пашаеҥ вӱдыш шуҥгалтше колызым утарен. Инспектор Денис Смирновын службым наҥгайымыже годым, туддеке изи рвезе куржын толын да кол кучымо годым пӧръеҥ вӱдыш пурен каен, а лектын ок керт манын увертарен. Полицейский вигак куржын миен, форман вургемым кудашде, вӱдыш тӧрштен, пӧръеҥым шӱдырен луктын. Эше ик еҥ дене, вашке полыш толын шумеш, икымше медицина полышым пуэныт. Тыге 66 ияш пӧръеҥым утарен коденыт.
