Звенигово районлан 95 ий темын
Кодшо кугарнян Звенигово район шкенжын 95 ияш лӱмгечыжым палемден. Верысе калыкым пайрем дене саламлаш Республикым вуйлатыше Александр Евстифеев миен. Районысо каныш рӱдерыште тудо кундемын сеҥымашыжым ончыктышо выставкым ончен, марий тӱрым, верысе сӱретче- влакын радынаштым аклен. Вуйлатыше районышто шочшо лӱмлӧ еҥ- влакым ушештарен. Тиде композитор- влак- Иван Ключников-Палантай, Яков Эшпай, Марий Эл гыч ик эн ончыч Совет Ушемын Геройжо лӱмым налше Сергей Бутяков да молат. Александр Евстифеев ял озанлыкыште, промышленностьышто, чоҥымо пашаште тыршыше- влакын республикым вияҥдымашке пыштыме надырыштым палемден. Тенийсе пел ийыште район 10 миллиард теҥгеаш сатум ыштен луктын. Гипс негызеш чоҥымо вартышым лукшо заводым, Шолеҥер посёлкышто «Родничок» йоча садым почмо, «Карусель» садикым почаш ямдылат, Красногорскысо кокымшо школ пелен стадион-площадке чоҥалтеш, Нурда- Мучаш ялыште гидротехнический сооруженийым капитально олмыктымо. Звенигово оласе коллекторым ачалаш 35 миллион теҥгем ойырымо, «Эҥер сер- Звениговын чонжо» проект илышыш шыҥдаралтеш. Калыкле проект почеш 27 кудывечым, 6 тӱшка верым олмыктымо. Республикым вуйлатыше тыгак палемден: калыкле проект- влакым шыҥдарымаш районым умбакыже тӱзатымаште сай шӱкалтыш лиеш. Шолеҥерыште тӱвыра пӧртым, Красногорскыште водозаборым чоҥаш палемдыме. Моло кӱлешан социал проект- влакат лийыт. Мучашлан Александр Евстифеев верысе калыкым шке кундемыштым йӧратымылан тауштен да пиалым, тазалыкым, сай кумылым тыланен.
