Самырык профессионал- влакын Тӱнямбал Чемпионатышт почылтын

Самырык профессионал- влакын Тӱнямбал Чемпионатышт почылтын
Теҥгече Марий Элым вуйлатыше Александр Евстифеев «Уорлдскилс» профессионал мастарлык шотышто Тӱнян  45-ше  Чемпионатшым почмашке Озаҥ олашке миен. Тушко Тӱнямбалсе 63 эл гыч тӱжемат 300 участник погынен. Марий Элыште самырык профессионал- влакым ямдылыме йодышлан кугу тӱткыш ойыралтеш. Алесандр Евстифеев ик гана веле огыл палемден: республикын правительствыже самырык тукымым профессионал пашалан туныктымашым ончыл верыш шында. Тидын нергенак ончычсо таҥасымаш- влакын лектышыштат ойла. Теве Йошкар-Оласе строитель техникумын тунемшыже Павел Казанцев Араб Эмиратыште эртыше 44-ше чемпионатыште Российын чапшым арален да профессионализмланже Медальоным налын. Тений Торгово-технологий колледжыште тунемше Наталья Иванова Калыкле сборныйын таҥасымашыштыже моштымашыжым ончыктен, Транспортно- энергетик техникум гыч Дмитрий Павлов регионысо чемпионатыште сеҥышыш лектын, 7-ше калыкле чемпионатыште призёр лийын, Арде профессионал техникумын студентше Максим Саракеев республикысе таҥасымаште чылам ончылтен кертын. Республикым вуйлатышын мутшо почеш, республикылан пашаче специальность- влак моткоч кӱлешан улыт. Тений «Уорлдскилс» толкынын материально- технический негызшым чоҥаш регионысо бюджет гыч 14 миллион утла теҥгем ойырымо. Ончыкыжым специалист- влакым шукырак да кумдарак специальность дене ямдылаш тӱҥалман, - каласен Александр Евстифеев.

Прошлые выпуски