Шкевуя чумырымо шӱк-куштыра орам мланде участкын озаже 30 кече жапыште кораҥдышаш

                     Мланде участкын озаже шкевуя чумырымо шӱк-куштыра орам 30 кече жапыште кораҥдышаш. Тӱрлӧ вере шӱкшакым чумырымаш экологий шотышто ик эн кумдан шарлыше правонарушенийлан шотлалтеш. Пӱртӱс поянлык министерствыште умылтарыме почеш, сурт-озанлыкысе шӱкшак тиде- пластик, кӱртньӧ да янда гына огыл, тыгак пӱртӱслан эҥгекым кондышо батарейка, ртутьян лампе, электроприбор да моло быт технике улыт. Республикыштына шке вуя чумырымо шӱк ора- влакым  «Благоустройство» регионысо оператор рашемда да кораҥда. Тыгай верым рашемдымеке оператор мланде участкын озажлан шижтарымашым возен колта. Мланде оза ик тылзыште шӱк-шакым кораҥдышаш але региональный оператор дене кораҥдашлан ойпидышым ыштышаш. Тиде ок шукталт гын, оператор шке кораҥда да мланде озалан счётым возен пуа. Тений региональный оператор 75 тыгай верым рашемден, 61-тыжым кораҥдыме. Тыгай верым пален налмеке региональный операторлан 60-00-72 номеран телефон дене йыҥгырташ лиеш.

Прошлые выпуски