Марий Элым вуйлатыше Советский посёлкышто у пачер деч сравочым кучыктен

                     Марий Элым вуйлатыше Советский посёлкышто тулык йоча да тошто пӧртла гыч кусарыме еҥ- влаклан у пачер деч сравочым кучыктен. Райрӱдыштӧ шуко пачеран у пӧртым чоҥымо. Тудын воктенак кевыт, тунемме тӧнеж- влак верланеныт. Шкеныштын икымше пачерыштым 7 тулык да ача-аван полышыж деч посна кодшо йоча- влак налыныт. Республикым вуйлатыше самырык еҥ- влакым шукертсек вучымо куанле событий дене саламлен да тидыже ешым чумыраш, йоча- влакым ончен- кушташ, пашам ышташ сай йӧн манын каласен.
                    Тыгак тудо аварийный пӧртлаште илыше- влаклан пачер деч сравочым кучыктен. Тиде пӧртыштӧ «калыкым тошто пӧртла гыч кусарыме» программе почеш 13 пачерым налын ямдылыме. Тошто  илемыштым аварийный вич пӧрт гыч 39 еҥ у пачер дене вашталтат. Тидыже программын икымше йыжыҥже гына. Вес ийлан эше 119 еҥ у илеман лийшаш. Чылаже кок тӱжем квадрат метр аварийный илыме верым пытарыман. Советский районышто тиде паша чолган виктаралтеш. Шуко пачеран пӧрт Роҥго селаште нӧлталтеш, Солнечный посёлкышто чоҥаш ямдылалтмаш кая.
                    Тений республике мучко 260 тулык йоча пачеран лиеш, ӱмаште 184 еҥлан пуымо ыле. Илаш йӧрыдымӧ пӧртла гыч 750 еҥ кусаралтеш, план почеш 570 еҥ лийшаш ыле. Тыге план эртарен темалтеш. Тиддеч посна районышто инфрастуктура вияҥдалтеш, корно чоҥалтеш, ял озанлык вияҥеш. Сравочым кучыктымеке Александр Евстифеев у пачер- влакым ончен савырнен, чоҥышо компанийлан пашам чаткан шуктымыжлан тауштен ойлен да погынышо-влакым чылаштым шушаш у ий дене саламлен.

Прошлые выпуски