Шошо вӱдшор умбакыже шуйна

Республикысе эҥерлаште шошо вӱдшор умбакыже шуйна. Тудо тений ик тылзылан ондак тӱҥалын. Изи Какшаныште Куярысе гидрологий постышто вӱд утларак нӧлталалтме палдырна. Арня тӱналтышыште суткаште 50 сантиметрлан ешаралтын. Тичмаш налмаште вӱд ныл метрлан  кӱзен. Элнет, Рутка, Вӱтла эҥерлаште вӱд кок метрлан келгырак лийын. Чебоксар вӱдаралтышыште ий кая. Марий гидрометрӱдер вич постышто кажне кечын кок гана тергымашым эртара- эрдене да кастене, вӱд чот шуко годым эше йӱдым да кечывалым ешартыш тергымаш- влак лийыт. Тидат оҥай: Юл эҥерыште 1903-шо, Изи Какшаныште 1933-шо, Элнетыште 1941-ше ийла гыч эскерымаш тӱналын.

Прошлые выпуски