Сотнур эмлыме верлан цифран рентген аппаратым налме
Сотнур эмлыме верлан цифран рентген аппаратым налме. Волжский районысо Сотнур эмлыме верыш «Тазалыкаралтыш» калыкле проект почеш 14 миллион теҥгеаш у цифран рентген аппаратым налме. Тудым тоштемше- 90-шо ийлаште лукмо аппарат олмеш вераҥдыме. Волжск оласе рӱдӧ эмлыме верын лучевой диагностике пӧлкажым вуйлатыше Ирина Чернован мутшо почеш оборудований тора районын пациентше- влаклан консультацийым дистанционно налаш йӧным пуа. Молан манаш гын, Волжск гыч специалист- влак Сотнур эмлыме верын ретген снимкыже- влакым вигак ончен кертыт. Ик сменыште 40 наре шымлымашым эртарат. Оласе эмлыме верын тӱҥ врачше Дмитрий Фризин палемден: «Тазалыкаралтышын первичный звеножым уэмдымаш» регионысо проект материальный базым палынак саемдаш полшен. 2021-ше ийыште тиде проект почеш Учимсолаште у ФАП-ым чоҥымо, олаште районысо рӱдӧ поликлиникым олмыктымо, эндоскопым, электрокардиографым, ныл автомобильым налме. 2022-шо ийыште райрӱдыштӧ кокымшо поликлиникым капитально ачалыме, рентген маммографым, рӱдӧ поликлиникыш стационар рентген аппаратым да куд автомобильым налме. А тений рентген аппарат деч посна рӱдӧ поликлиникылан флюорографым кондымо.
Фото: Тазалыкаралтыш министерстве.
Фото: Тазалыкаралтыш министерстве.
