Таче чоҥышо- влак шке профессионал пайремыштым палемдат

           Таче чоҥышо- влак шке профессионал пайремыштым палемдат. Тидын вашеш теҥегече Марий Элым вуйлатышын пашажым шуктышо Юрий Зайцев тиде кечылан пӧлеклалтше торжественный мероприятийыште участвоватлен. Тудо палемден- чоҥымо комплекс- республикысе экономикын локомотивше. Тудо чоҥымашым гына огыл, а моло отрасльымат ушен шога: чоҥымо материалым лукмашым, ресурсым ситарыше органиазций- шамычым, банк секторым да молымат. Чоҥымо паша Республикысе правительствын пашаштыжат ончылно шога. Отрасль дене социал да экономик задачым шуктымаш, калыкын илышыжым саемдымаш, нунылан илымеверым ситарымаш, илыме да коммунал озанлык полышым пуымаш кылдалтын шогат. 2027-ше ий марте Марий Элыште кок миллион квадрат метр утла илыме верым чоҥаш палемдыме. Тидыже ятыр вашталтышым сӧра.- каласен Юрий Зайцев.
            Тудо икмыняр чоҥышын надыржым палемден. «Марий Эл ончылно надырлан» икымше степенян орден дене «Марспецмонтаж» ушемын генеральный директоржо Хамза Баширов палемдалтын. «Марий Элын сулло чоҥышыжо» Чап лӱмым проект документацийлан да инженер шымлымашын лектышыжлан кугыжаныш экспертизым эртарыме виктемым вуйлатыше Лев Зверевлан да Марий силикат кермыч заводын машинистше Александр Редькинлан пуымо. Тыгак Правительствын Чап Грамотыжым Советский район гыч штукатур-маляр Елена Загайнова, Медведево район гыч «Офис-сталь» ушемын директоржо Ярослав Михеев, «Соцжилкоммунстройын» тӱҥ бухгалтерже Ирина Симонова Советский район гыч плотник Владимир Яковлевлан кучыктымо. Марий Элым вуйлатышын тауштымашыжым «Инноваций инжиниринг» ушемын директоржо Алексей Лазаревлан, Силикат кермыч заводын директоржын алмаштышыже Лилия Моисеевалан, «ПМК-5 спецзастройщик» ушемын гендиректоржо Павел Симохинлан увертарыме.
             Фото: Марий Элым вуйлатышын организаций да аналитик виктемже.

Прошлые выпуски