Владимир Путин Юрий Зайцев дене республикым вияҥдыме тӱҥ задаче- влакым каҥашен

             Теҥгече Российын президентше Владимир Путин Марий Элым вуйлатышын пашажым шуктышо Юрий Зайцев дене республикым вияҥдыме тӱҥ задаче- влакым каҥашен. Юрий Зайцев президентлан увертарен: республикысе ситуацийым шымлен шуктен, ятыр йодышым шке контрольышкем налынам манын. Социал-экономик верым вияҥме нерген ойлышыла Юрий Зайцев туризмым, тазалыкаралтышым, Ай-Ти отрасльым вияҥдымым палемден.
            Аэропортын чоҥештен кӱзымӧ да волен шичме полосам уэмдаш, «Шереметев замкым» пужен ышташ, Перинатал рӱдерын акушер да физиологий корпусшым олмыкташ кӱлешлыкым палемден. Тыгак тудо ешарен: республике Российысе 19 кугыжаныш программыште участвоватла. Тудлан тений 28 миллиард теҥге ойыралтеш. Икымше пелийыште регионысо валовый продуктым кугемден кертме. Таче кечылан тудо 224 миллиард теҥгеш шуэш.
             Тӱҥ капиталыш инвестиций вич наре процентлан кугемын да 6 миллиардат 400 миллион теҥгеш шуын. Республикысе предприятий- влак 26 миллиард теҥгеаш 123 инвестиций проектым шыҥдарат. Ял озанлык продукцийын да производствын кугеммашыже 56 миллиард теҥге лийшаш. Кушмаш 8 процент утла лийшаш. Кугыжаныш парым изем толеш. Икымше январьлан лу миллиардат пеле лийын гын, икымше августлан 9 миллиардат 900 миллион теҥге кодын. 2024-ше ий мучаш марте 45 процент автомобиль корно норматив дене келшыше лийшаш. 50 процент марте 166 меҥге ок сите. Тудым олмыкташ ешарен 3-4 миллиард теҥге кӱлеш лиеш.
            Республике деке тӱткышлан Юрий Зайцев Владимир Путинлан тауштен да республикын жемчужиныже «Шереметев замкыш» толын каяш ӱжын. Президент инвестиций проект- влакым шыҥдарымашым республикылан кӱлешан корно семын палемден да Марий Эл Российысе корно- влакым чоҥымо программыш пурен кертеш манын. А тидыже корным олмыкташ оксам кугемдаш йӧным пуа. Тичмаш налмаште тендан пашам ышташ сай опытда уло, республике ончылно шогышо цельыш шуаш тендан чыла ситыше манын мучашлан Владимир Путин.
             Фото: Марий Элым вуйлатышын организаций да аналитик виктемже.

Прошлые выпуски