Таче- туныктышын кечыже
Таче туныктышын кечыже палемдалтеш. Туныктышо, туныктымо тӧнежлаште тыршыше, педагогика пашан ветеранже- влакым Марий Элым вуйлатыше Александр Евстифеев саламла. Педагог профессий ик эн калыкле, уста, поро, илышыште кӱлешан паша. Школ жап айдемын илышыштыже негызым пыштыме жап, шинчымаш ден моштымашым пуа, айдемым личность семын ямдыла, шонымашке шуаш, нелылыкым сеҥаш да ответственностьым налаш туныкта. Выпускник могай лиеш, тидыже туныктышо деч шога. Кызыт республикыште 251 туныктымо тӧнеж пашам ышта. Тушто куд тӱжем утла туныктышо тырша. У тунемме ий икмыняр кӱлешан событий дене кылдалтын. Тиде- Йошкар-Олаште у школым, республикыште 15 «Точка роста» рӱдерым почмаш, Волжскышто школын у корпусшым чоҥен пытарымаш, школ- влаклан компьютер оборудованийым налмаш, пищеблок- влаклан у техникым ситарымаш да молат. Правительствын планыштыже- эше у школ- влакым чоҥаш, улшыжым уэмдаш, техникым налаш, ешартыш шинчымашым пуышо рӱдер- влакым почаш шонымаш уло. Ятыр туныктышо сулен налме канышыш каен. Но нуно тунемше- влакын шӱмешышт курымлан кодыт. Сандене ме шке туныктышына- влакым порын шарналтена. Самырык тукымым Ачамланде дене кугешнаш туныктымылан, Элнан да шочмо кундемнан историй ден тӱвыражым шымлаш кумылаҥдымылан таум каласем да чылалан пеҥгыде тазалыкым, сай илышым, тыршыше тунемше- влакым тыланем,- ойлалтеш республикым вуйлатышын саламлымашыштыже.
