Телым вольык ток лиеш

Морко районышто кормам шапашлыме тургымым иктешлат. Пасушто тыршыше- влакын тиде ик эн неле тургым. Чапле кормам жапыштыже ямдылен шуктет гын, вольык таза да сай лектышан лиеш. Кызыт Морко районысо озанлыклаште шудо ден сенажым ямдылат. Игече сай йӧным ыштен шога. Чоштыра кормам шапашлымаш мучашыш лишемеш гын, нӧрӧ кормам эше траншейыш оптат. 28-ше июльлан шотлымаште Морко районысо ял озанлык предприятий, фермер озанлык- влак кок тӱжемат 500 утла тонн шудым аралаш пыштеныт. Тидыже планын 170 процентше лиеш. Сенажым 9 тӱжем утла тонным оптымо, але 121 процентым, силосым ныл тӱжемат 500 тонным. Тидыже эше 58 процент гына лиеш. Ик вуй вольыклан шотлымаште 21 центнер кормовой единицым шапашлыме. Поснак сай лектыш дене «Передовик», «Знамя», «Семисола» озанлыкын вуйлатышышт ден механизаторышт тыршат, Ильинын, Рагимовын, Каменскйын озанлыкышт сай тыршымашым ончыктеныт. Озанлыклаште кызыт шурным погымо техникым ямдылат. Тений пырчан парчан да отызан культурым районышто куд тӱжемат 920 гектар гыч поген налаш кӱлеш. Кокияшым ӱдашлан 770 гектар мландым ямдылыме.

Прошлые выпуски