Тений идалык мучаш марте аварийный пӧртла гыч тӱжемат 700 еҥым кусарыме лиеш
Тений идалык мучаш марте аварийный пӧртла гыч тӱжемат 700 еҥым кусарыме лиеш. Кызыт нунылан 12 шуко пачеран пӧрт чоҥалтеш. Марий Элым вуйлатыше Юрий Зайцев Правительствын еҥже- влак да муниципал образованийлам вуйлатыше- влак дене калыкым кусарыме, тулык йоча- влаклан пачерым пуымо, илыме верым чоҥымо шотышто планыме темыме да социал илыш дене кылдалтше йодыш- влакым каҥашен. Чоҥымаш, архитектура, илыме вер да коммунал озанлык министрын сомылжым шуктышо Людмила Домрачеван мутшо почеш, калыкым кусарыме шотышто республикысе адресан программе 2019-ше - 2023-шо ий- влаклан палемдалтын. Палемдыме мероприятий- влак огыт шукталт манын лӱдыкшӧ уке. Идалык мучаш марте 23 тӱжем утла квадрат метр аварийный илемым пытарыман, тӱжемат 744 еҥым кусараш кӱлеш. Пӧрт- влак кызыт Волжскышто, Йошкар-Олаште, Козьмодемьянскыште, Волжский, Куженер, Марий Турек, Морко, У Торъял, Параньга да Шернур районлаште чоҥалтыт. Нуным тений идалык мучаш марте ямдылен шуктышаш улыт. Тиддеч посна тений тулык йоча- влаклан илыме верым налаш 372 миллион теҥгем палемдыме. Чылаже 189 пачерым налшаш улыт.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
