Тений Йошкар-Олаште коммунал инфраструктурын кок объектшым эксплуатацийыш колтышаш улыт
Тений Йошкар-Олаште коммунал инфраструктурын кок объектшым эксплуатацийыш колтышаш улыт. Кызыт Козьмодемьянск тракт да Йыван Кырла урем дене шуйнышо самотёчный коллекторын Черняков деч Бауман урем марте ужашыжым пужен ыштат да канализаций насос станцийым чоҥат. Паша адресан инвестиций программе кышкарыште шукталтеш. Регионлаште федерал адресан инвестиций программым шыҥдарыме, чоҥен шуктыдымо объект- влакын чотыштым шагалемдыме пашам, коммунал инфраструктурым уэмдыме йодышым Россий Правительство комиссий президиумын заседанийыштыже каҥашыме. Тудым Россий Правительство вуйлатышын алмаштышыже Марат Хуснуллин эртарен. Тушто Марий Элым вуйлатыше Юрий Зайцев участвоватлен. Российын вице-премьерже палемден: корным чоҥаш, коммунал инфраструктурым уэмдаш лимитым регион- влаклан шуктымо да ешартыш оксам ойырымо йодышым Президент Владимир Путин шке контрольыштыжо куча. Самотёчный коллекторым пужен ышташ 290 миллион теҥгем колтымо. Контрактым ыштыме, паша шукталтеш. Идалык мучашлан ыштен шуктышаш улыт. Насос станцйиым шошымак мучашлаш палемдыме. Тудын акше 300 миллион теҥгеш шуэш. Юрий Зайцев ик гана веле огыл инженер сеть ден объект- влакым модернизироватлыме йодышым федерал кӱкшытыштӧ нӧлталын. Январьыште рашемын: Марий Эл коммунал инфраструктурым уэмдаш 615 миллион теҥгем налеш. Тиде программыш 8 объектым пуртымо, 2023-ш0 - 2024-ше ийлан тӱшка финансированийын кугытшо 746 миллион теҥге лиеш. Чоҥен пытарыдыме объект- влак шотышто ойлаш гын, республикыштына нуным индивидуал программыш пуртымо. Кодшо ийын нуным 47 единицылан шагалемдыме.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
